स्थानिक गुन्हे शाखा व बारामती तालुका पोलिसांची संयुक्त कारवाई; एसटी बसस्थानक परिसरातून घेतले ताब्यात
योगेश राऊत
बारामती तालुक्यात घरफोडी करून सोन्याचे दागिने चोरणाऱ्या एका महिलेला स्थानिक गुन्हे शाखा आणि बारामती तालुका पोलिसांनी संयुक्त कारवाई करत अटक केली. जयपाल लखन पवार (वय ४१, रा. निरावाघज फाटा, निरावाघज, ता. बारामती, जि. पुणे) असे अटक केलेल्या महिलेचे नाव आहे. तिच्याकडून सुमारे चार तोळे सोन्याचे दागिने, असा एकूण सहा लाख रुपये किमतीचा मुद्देमाल जप्त करण्यात आला आहे. या कारवाईमुळे बारामती परिसरातील मालमत्तेविषयक गुन्ह्यांचा तपास करताना पोलिसांना महत्त्वाचे यश मिळाले आहे.
बारामती तालुका पोलीस ठाण्यात घरफोडी चोरीप्रकरणी गुन्हा रजिस्टर क्रमांक ४१८/२०२६ अन्वये भारतीय न्याय संहितेच्या कलम ३०५ (ब) आणि ३३१ (३) प्रमाणे गुन्हा दाखल करण्यात आला होता. या गुन्ह्याचा तपास करताना पुणे ग्रामीणचे पोलीस अधीक्षक संदीप सिंह गिल्ल यांनी स्थानिक गुन्हे शाखेच्या पथकाची बैठक घेऊन बारामती परिसरातील मालमत्तेविषयक गुन्हे उघडकीस आणण्याच्या सूचना दिल्या होत्या.
त्यानुसार स्थानिक गुन्हे शाखेच्या पथकाने तपासाला सुरुवात केली. गुन्हा घडलेले ठिकाण, गुन्ह्याची वेळ आणि चोरी करण्याची कार्यपद्धती यांची माहिती संकलित करून विविध अंगांनी तपास सुरू करण्यात आला. या तपासादरम्यान गोपनीय बातमीदारामार्फत संबंधित घरफोडी चोरी एका महिलेने केल्याची माहिती पोलिसांना मिळाली.
मिळालेल्या गोपनीय माहितीनुसार, जयपाल लखन पवार ही महिला बारामती एसटी बसस्थानक परिसरात असून तेथून सातारा येथे जाण्याच्या तयारीत असल्याचे पोलिसांना समजले. त्यानंतर स्थानिक गुन्हे शाखेच्या पथकाने बारामती तालुका पोलीस ठाण्यातील महिला पोलिसांच्या मदतीने संबंधित ठिकाणी जाऊन शोधमोहीम राबवली. यावेळी संशयित महिलेला बसस्थानक परिसरातून ताब्यात घेण्यात आले.
पोलिसांनी तिच्याकडे चौकशी केली असता, तिने संबंधित घरफोडी चोरी केल्याची कबुली दिल्याचे पोलिसांनी सांगितले. त्यानंतर तिच्याकडून सुमारे चार तोळे सोन्याचे दागिने हस्तगत करण्यात आले. जप्त केलेल्या सोन्याच्या दागिन्यांची किंमत सुमारे सहा लाख रुपये असल्याची माहिती पोलिसांनी दिली.
ही कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार आणि बारामती उपविभागाचे उपविभागीय पोलीस अधिकारी चैतन्य कदम यांच्या मार्गदर्शनाखाली करण्यात आली.
स्थानिक गुन्हे शाखेचे पोलीस निरीक्षक प्रमोद क्षीरसागर, बारामती तालुका पोलीस ठाण्याचे पोलीस निरीक्षक नारायण पवार, स्थानिक गुन्हे शाखेचे पोलीस उपनिरीक्षक सुधीर वाळुंज व बाळासाहेब कारंडे, तसेच बारामती तालुका पोलीस ठाण्याचे ग्रेड पोलीस उपनिरीक्षक भोसले यांच्यासह पोलीस अंमलदार शिवाजी निकम, सचिन होळकर, स्वप्नील अहिवळे, पोपट नाळे, किशोर तेलंग, शैलेश स्वामी, गुलाब पाटील, सुलतान डांगे, तुषार चव्हाण, गणेश डेर, रहिस मुलानी आणि महिला पोलीस हवालदार देवकाते यांनी या कारवाईत सहभाग घेतला.
या गुन्ह्याचा पुढील तपास बारामती तालुका पोलीस ठाण्याचे ग्रेड पोलीस उपनिरीक्षक भोसले करीत आहेत. घरफोडी चोरीच्या या प्रकरणात पोलिसांनी तातडीने कारवाई करून चोरीचा मुद्देमाल हस्तगत केल्याने तपासाला महत्त्वाची दिशा मिळाली आहे.
