कुरकुंभ प्रतिनिधी : सुरेश बागल
सातव्या माळेला विशेष महत्त्व; भाविकांच्या सोयीसाठी प्रशासन व ग्रामपंचायतीकडून विविध उपाययोजना
कुरकुंभ : दौंड तालुक्यातील कुरकुंभ येथील श्री फिरंगाई मातेचा शारदीय नवरात्र उत्सव रविवार, दि. ११ ऑक्टोबर २०२६ पासून सुरू झाला आहे. नवसाला पावणारी देवी म्हणून श्री फिरंगाई मातेची भाविकांमध्ये श्रद्धा असून, महाराष्ट्राच्या कानाकोपऱ्यातून भाविक देवीच्या दर्शनासाठी येत आहेत. या उत्सवात सातव्या माळेला विशेष महत्त्व असल्याने त्या दिवशी मोठ्या संख्येने भाविक उपस्थित राहतात. या पार्श्वभूमीवर भाविकांना सुलभ व सुरक्षित दर्शन घेता यावे, यासाठी प्रशासन आणि ग्रामपंचायतीच्या वतीने विविध उपाययोजना करण्यात आल्या आहेत.
श्री फिरंगाई मातेचे मंदिर ऐतिहासिक आणि प्राचीन असून, या मंदिराला शिवकालीन ऐतिहासिक परंपरा असल्याची माहिती मंदिराचे विश्वस्त काशिनाथ गोरे यांनी दिली. देवीच्या दर्शनासाठी दरवर्षी मोठ्या संख्येने भाविक येतात. विशेषतः नवरात्रोत्सवातील सातव्या माळेला दर्शनासाठी भाविकांची मोठी गर्दी होत असते. त्यामुळे गर्दीचे नियोजन, वाहतूक व्यवस्था आणि भाविकांच्या सुविधांकडे विशेष लक्ष देण्यात येत आहे.
नवरात्रोत्सवाच्या पार्श्वभूमीवर तहसीलदार अरुण शेलार यांच्या मार्गदर्शनाखाली आढावा बैठक घेण्यात आली. उत्सवाच्या काळात कायदा व सुव्यवस्था अबाधित राहावी, वाहतूक कोंडी होऊ नये आणि भाविकांना दर्शनासाठी कोणतीही अडचण येऊ नये, यासाठी संबंधित यंत्रणांना आवश्यक नियोजन करण्याच्या दृष्टीने उपाययोजना करण्यात आल्या आहेत.
ग्रामपंचायतीच्या वतीने पिण्याच्या पाण्याची व्यवस्था, वीजपुरवठा आणि स्वच्छतेची कामे करण्यात आली आहेत. मंदिर परिसरात विद्युत रोषणाई करण्यात आल्याने मंदिर परिसर उजळून निघाला आहे. भाविकांची संभाव्य गर्दी लक्षात घेऊन सुरक्षित दर्शनरांगा, महिलांसाठी स्वतंत्र व सुरक्षित रांगांची व्यवस्था, सीसीटीव्ही कॅमेऱ्यांद्वारे देखरेख, स्वच्छतागृहे आणि आपत्कालीन परिस्थितीसाठी रुग्णवाहिकेची सुविधा उपलब्ध ठेवण्यासह आवश्यक खबरदारी घेण्यात आली आहे.
श्री फिरंगाई मातेच्या दर्शनासाठी सातव्या माळेला दूरदूरच्या भागांतून भाविक येत असल्याने या दिवशी मंदिर परिसरात मोठी गर्दी होते. गर्दीचे योग्य व्यवस्थापन करून भाविकांना सुरक्षितपणे दर्शन घेता यावे, यासाठी प्रशासनाकडून बंदोबस्त आणि वाहतूक नियोजनावर भर देण्यात आला आहे. भाविकांची गैरसोय टाळण्यासाठी संबंधित यंत्रणांनी सतर्क राहण्याचे नियोजन केले आहे.
यंदा घटस्थापनेपासून पौर्णिमेपर्यंत पंधरा दिवसांचा शारदीय नवरात्र उत्सव साजरा करण्यात येत आहे. धार्मिक श्रद्धा, ऐतिहासिक परंपरा आणि भाविकांचा उत्स्फूर्त सहभाग यामुळे कुरकुंभ येथील श्री फिरंगाई मातेचा नवरात्रोत्सव परिसरातील भाविकांसाठी महत्त्वाचा ठरत आहे.
