सत्य, अहिंसा आणि ‘जय जवान, जय किसान’च्या विचारांना अभिवादन; मान्यवरांसह ग्रामस्थांची उपस्थिती
कानगाव प्रतिनिधी – ऋषिकेश सोंडकर
कानगाव, दि. २ : दौंड तालुक्यातील कानगाव ग्रामपंचायत कार्यालयात राष्ट्रपिता महात्मा गांधी आणि भारताचे माजी पंतप्रधान लाल बहादूर शास्त्री यांच्या जयंतीनिमित्त अभिवादन कार्यक्रम उत्साहात पार पडला. यावेळी दोन्ही महान व्यक्तिमत्त्वांच्या प्रतिमांना पुष्पहार अर्पण करून त्यांच्या राष्ट्रसेवेतील योगदानाचे स्मरण करण्यात आले.
महात्मा गांधी यांनी सत्य, अहिंसा आणि शांततेच्या मार्गाने देशाला स्वातंत्र्याच्या लढ्यात नेतृत्व दिले. त्यांच्या विचारांनी केवळ भारतालाच नव्हे, तर संपूर्ण जगाला मानवता, बंधुता आणि शांततेचा संदेश दिला. स्वच्छतेला त्यांनी दिलेले महत्त्व आजही समाजासाठी मार्गदर्शक ठरत आहे. त्यांच्या विचारांचे आचरण प्रत्येक नागरिकाने आपल्या दैनंदिन जीवनात करणे गरजेचे असल्याचे यावेळी अधोरेखित करण्यात आले.
तर लाल बहादूर शास्त्री यांनी देशाच्या पंतप्रधानपदाची जबाबदारी सांभाळताना साधेपणा, प्रामाणिकपणा आणि कर्तव्यनिष्ठेचा आदर्श घालून दिला. ‘जय जवान, जय किसान’ हा त्यांचा प्रेरणादायी नारा देशाच्या संरक्षणासाठी झटणाऱ्या जवानांचा आणि अन्नधान्य उत्पादन करणाऱ्या शेतकऱ्यांचा सन्मान करणारा आहे. देशाच्या प्रगतीमध्ये जवान आणि शेतकरी यांचे योगदान अनन्यसाधारण असल्याचा संदेश त्यांच्या विचारांतून मिळतो.
आजच्या बदलत्या सामाजिक परिस्थितीत महात्मा गांधी यांचे सत्य, अहिंसा व स्वच्छतेचे विचार आणि लाल बहादूर शास्त्री यांची राष्ट्रनिष्ठा, साधेपणा व कर्तव्यभावना नव्या पिढीपर्यंत पोहोचविणे आवश्यक आहे. त्यांच्या कार्याचे स्मरण करून समाजहितासाठी योगदान देण्याचा संकल्प प्रत्येकाने करावा, असे आवाहन यावेळी करण्यात आले.
या कार्यक्रमास ग्रामपंचायतीचे कर्मचारी, प्रतिनिधी, नागरिक आणि ग्रामस्थ उपस्थित होते. उत्साहपूर्ण वातावरणात दोन्ही महान नेत्यांना अभिवादन करून कार्यक्रमाची सांगता झाली.
