दर्शनासाठी आलेल्या महिलेच्या सोन्याच्या दागिन्यावर चोरट्यांचा डल्ला; दौंड पोलीस ठाण्यात अज्ञात चोरट्याविरुद्ध गुन्हा दाखल
योगेश राऊत
कुरकुंभ (ता. दौंड) येथील फिरगाई माता मंदिरात दर्शनासाठी आलेल्या महिलेच्या सोन्याच्या गंठणाची चोरी झाल्याची घटना मंगळवारी (दि. १३ ऑक्टोबर) दुपारी एक वाजण्याच्या सुमारास घडली. या घटनेत अंदाजे २४ ग्रॅम वजनाचे आणि सुमारे १ लाख ६० हजार रुपये किमतीचे सोन्याचे गंठण अज्ञात चोरट्याने चोरून नेल्याची फिर्याद दौंड पोलीस ठाण्यात दाखल करण्यात आली आहे.
याप्रकरणी सिंधुबाई बाळासाहेब पाचंगे (वय ५०, रा. ढोकसांगवी, ता. शिरूर, जि. पुणे) यांनी पोलिसांकडे फिर्याद दिली आहे. त्यानुसार दौंड पोलीस ठाण्यात गुन्हा रजिस्टर क्रमांक ७६९/२०२६ अन्वये भारतीय न्याय संहितेच्या कलम ३०३(२) प्रमाणे अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवारी दुपारी कुरकुंभ येथील फिरगाई माता मंदिरात ही घटना घडली. यावेळी फिर्यादी सिंधुबाई पाचंगे यांच्या अंदाजे २४ ग्रॅम वजनाच्या सोन्याच्या गंठणाची चोरी झाली. चोरीस गेलेल्या दागिन्याची किंमत सुमारे १ लाख ६० हजार रुपये असल्याचे फिर्यादीत नमूद करण्यात आले आहे. मंदिर परिसरात घडलेल्या या प्रकारामुळे भाविकांच्या मौल्यवान वस्तूंच्या सुरक्षिततेचा प्रश्न ऐरणीवर आला आहे.
घटनेची माहिती मिळाल्यानंतर दौंड पोलीस ठाण्यात गुन्हा दाखल करण्यात आला असून, अज्ञात चोरट्याचा शोध घेण्याचे आव्हान पोलिसांसमोर आहे. या प्रकरणाचा पुढील तपास पोलीस कॉन्स्टेबल महादेव जाधव करीत आहेत.
मंदिरात दर्शनासाठी जाताना भाविकांनी सोन्याचे दागिने व मौल्यवान वस्तूंची काळजी घ्यावी, असे आवाहन करण्यात येत आहे.
