ऋतुजा शिंदे हिची जिल्हास्तरीय हस्ताक्षर स्पर्धेसाठी निवड; आराध्या शिंदे कथालेखनात द्वितीय, तर गौरी माने हस्ताक्षरात तृतीय
योगेश राऊत
बालकुमार मराठी साहित्य संमेलन २०२६ अंतर्गत आयोजित दौंड तालुकास्तरीय विद्यार्थी स्पर्धेत हातवळण येथील जिल्हा परिषद प्राथमिक शाळेच्या तीन विद्यार्थिनींनी उल्लेखनीय यश संपादन केले. हस्ताक्षर स्पर्धेत ऋतुजा रमेश शिंदे हिने प्रथम क्रमांक मिळविला असून, तिची जिल्हास्तरीय हस्ताक्षर स्पर्धेसाठी निवड झाली आहे. कथालेखन स्पर्धेत आराध्या दादा शिंदे हिने द्वितीय, तर हस्ताक्षर स्पर्धेत गौरी राजाराम माने हिने तृतीय क्रमांक पटकाविला. या स्पर्धा २४ ऑक्टोबर रोजी वरवंड येथील नागनाथ विद्यालयात झाल्या.
तालुकास्तरावर प्रथम क्रमांक मिळवून जिल्हास्तरीय स्पर्धेची संधी मिळविणाऱ्या ऋतुजाचे यश विशेष उल्लेखनीय आहे. आराध्याने कथालेखनातून आपली सर्जनशीलता दाखविली, तर गौरीने हस्ताक्षर स्पर्धेत तृतीय क्रमांक मिळवत आपली गुणवत्ता सिद्ध केली. तिन्ही विद्यार्थिनींच्या कामगिरीमुळे शाळेच्या शैक्षणिक आणि साहित्यिक उपक्रमांना अभिमानाची नवी जोड मिळाली आहे.
या यशात विद्यार्थिनींच्या मेहनतीबरोबरच सरावासाठी मिळालेली संधी आणि मार्गदर्शनाचाही वाटा आहे. ‘अक्षरछंद’ टीमने आयोजित केलेल्या दोन हस्ताक्षर सुधार कार्यशाळांमध्ये अक्षरांची रचना, वळण, आकारमान आणि लेखनातील शिस्त यांवर भर देण्यात आला. या कार्यशाळांमुळे विद्यार्थ्यांना हस्ताक्षर सुधारण्यासाठी मार्गदर्शन व सरावाची संधी मिळाली. या उपक्रमाचा विद्यार्थिनींच्या कामगिरीला फायदा झाल्याची भावना पालकांनी व्यक्त केली.
‘अक्षरछंद’ टीमचे पाटील पांडुरंग जाधव, मिलिंद टेंगले, कैलास थोरात आणि सुभाष फासगे यांनी विद्यार्थ्यांना मार्गदर्शन केले. शाळेचे मुख्याध्यापक बाळासाहेब आढागळे तसेच शिक्षक महादेव भालेराव, दिलीप साळुंके, छाया साळुंके, अक्षय गवळी आणि रावसाहेब घोरपडे यांनीही विद्यार्थिनींना प्रोत्साहन दिले.
विद्यार्थिनींच्या या यशातून मेहनत, सातत्यपूर्ण सराव आणि योग्य मार्गदर्शन यांचे महत्त्व अधोरेखित झाले आहे. ऋतुजा, आराध्या आणि गौरी यांच्या कामगिरीचे हातवळण परिसरातून कौतुक होत असून, जिल्हास्तरीय स्पर्धेसाठी निवड झालेल्या ऋतुजाकडून पुढील फेरीतही उज्ज्वल कामगिरीची अपेक्षा व्यक्त होत आहे.
