वरवंड | प्रतिनिधी
वरवंड परिसरातील गणेशवाडी येथील श्री गणेश तरुण मंडळाने ६७ वर्षांची गौरवशाली परंपरा जपत गणेशोत्सवाची सामाजिक, सांस्कृतिक आणि धार्मिक परंपरा आजही कायम ठेवली आहे. सन १९६० साली स्थापन झालेल्या या मंडळाने अनेक पिढ्यांना आपल्या कार्याशी जोडत गणेशभक्तीची परंपरा पुढे नेली आहे.
श्री गणपतीची भक्तिभावाने प्रतिष्ठापना करण्याची परंपरा असलेल्या या परिसराला पुढे ‘गणेशवाडी’ म्हणून ओळख मिळाली. या नावामागील गणेशभक्ती आणि श्रद्धेची परंपरा आजही श्री गणेश तरुण मंडळाच्या माध्यमातून जिवंत असल्याचे पाहायला मिळते.
गेल्या ६७ वर्षांच्या प्रवासात असंख्य कार्यकर्ते आणि गणेशभक्त मंडळाशी जोडले गेले. त्यांच्या मेहनतीतून, सहकार्यातून आणि श्रद्धेतून मंडळाची परंपरा सातत्याने पुढे चालत आली आहे.
वरवंड आणि पंचक्रोशीच्या सामाजिक व सांस्कृतिक जीवनात मंडळाने आपले वेगळे स्थान निर्माण केले असून, जुन्या परंपरांचा वारसा जपत नव्या पिढीला गणेशोत्सवाशी जोडण्याचे काम मंडळाच्या माध्यमातून सुरू आहे.
यंदाच्या गणेशोत्सवाच्या आयोजनात पूजक म्हणून सुरज नानासो दिवेकर, खजिनदार अभिषेक अनिल दिवेकर, उपाध्यक्ष रामकृष्ण हरिदास शितोळे आणि अध्यक्ष सौरभ जयदीप दिवेकर यांच्यासह श्री गणेश तरुण मंडळाचे सर्व कार्यकर्ते सक्रियपणे सहभागी आहेत.
६७ वर्षांचा हा प्रवास म्हणजे केवळ कालखंड नसून, असंख्य कार्यकर्त्यांची मेहनत, गणेशभक्तांची श्रद्धा आणि ग्रामस्थांच्या सहकार्याची गौरवगाथा आहे. ही गौरवशाली परंपरा पुढील पिढीकडेही अशाच उत्साहाने आणि अभिमानाने सुपूर्द करण्याचा संकल्प मंडळाच्या माध्यमातून जपला जात आहे.
