नागनाथ ज्येष्ठ नागरिक संघ आणि बुधराणी हॉस्पिटलचा संयुक्त उपक्रम; ८,८०२ रुग्णांची तपासणी, २,७१४ जणांना अल्पदरात चष्मेवाटप
योगेश राऊत
ग्रामीण भागातील गरजू रुग्णांना मोतीबिंदूच्या आजारावर वेळेत निदान आणि उपचार मिळावेत, तसेच अंधत्वाचा धोका दूर होऊन त्यांच्या जीवनात पुन्हा प्रकाश यावा, या उद्देशाने नागनाथ ज्येष्ठ नागरिक संघ, पाटस यांच्या वतीने जून २०१६ पासून मोफत मोतीबिंदू निदान अभियान अखंडपणे राबविण्यात येत आहे. या सामाजिक उपक्रमांतर्गत आतापर्यंत सप्टेंबर २०२६ अखेर एकूण ८ हजार ८०२ रुग्णांची तपासणी करण्यात आली असून, त्यापैकी ५ हजार ७०४ रुग्णांवर यशस्वीरीत्या मोतीबिंदू शस्त्रक्रिया करण्यात आल्या आहेत. तसेच २ हजार ७१४ रुग्णांना अल्पदरात चष्म्यांचे वाटप करण्यात आले आहे.
नागनाथ ज्येष्ठ नागरिक संघ, पाटस आणि के.के.आय. इन्स्टिट्यूट, साधू वासवानी मिशन संचलित बुधराणी हॉस्पिटल, कोरेगाव पार्क, पुणे यांच्या संयुक्त विद्यमाने दर महिन्याच्या २० तारखेला पाटस येथे मोफत मोतीबिंदू निदान शिबिर आयोजित केले जाते. गेल्या दहा वर्षांहून अधिक काळ सुरू असलेल्या या उपक्रमामुळे परिसरातील अनेक गरजू रुग्णांना नेत्रतपासणी आणि पुढील उपचारांसाठी मदत मिळत आहे.
मंगळवार, दि. २० ऑक्टोबर २०२६ रोजी आयोजित मोफत मोतीबिंदू निदान शिबिरात एकूण १७ रुग्णांची नेत्रतपासणी करण्यात आली. यामध्ये १४ रुग्णांची मोतीबिंदू शस्त्रक्रियेसाठी निवड करण्यात आली. त्यापैकी शुक्रवार, दि. २३ ऑक्टोबर रोजी ११ रुग्णांना पुढील शस्त्रक्रियेसाठी पुण्यातील कोरेगाव पार्क येथील बुधराणी हॉस्पिटलमध्ये पाठविण्यात आले.
या शिबिरासाठी बुधराणी हॉस्पिटलचे श्री. गिरीश पाटील यांचे सहकार्य लाभले. यावेळी नागनाथ ज्येष्ठ नागरिक संघ, पाटसचे संस्थापक अध्यक्ष नेत्रमित्र डॉ. पांडुरंग श्रीपतराव लाड उपस्थित होते.
मोतीबिंदूमुळे दृष्टी कमी होणाऱ्या आणि आर्थिक अडचणींमुळे उपचार घेण्यास विलंब करणाऱ्या रुग्णांना वेळेत वैद्यकीय मदत मिळावी, यासाठी या अभियानाच्या माध्यमातून सातत्याने प्रयत्न केले जात आहेत. मोफत निदान शिबिर, शस्त्रक्रियेसाठी रुग्णांची निवड आणि रुग्णांना रुग्णालयापर्यंत पोहोचविण्याची व्यवस्था अशा टप्प्यांतून हा उपक्रम राबविला जात आहे.
‘अंधत्वाकडून दृष्टिकडे मुक्त अभियान’ या संकल्पनेतून मोतीबिंदूमुक्त समाज घडविण्यासाठी संघटनेच्या माध्यमातून भविष्यातही हा उपक्रम अधिक व्यापक करण्याचा मानस आहे. ग्रामीण भागातील गरजू नागरिकांना दृष्टीचा लाभ मिळवून देण्याबरोबरच त्यांच्या जीवनमानात सुधारणा घडवून आणण्याच्या दृष्टीने हा उपक्रम महत्त्वपूर्ण ठरत आहे.
जून २०१६ पासून सुरू असलेल्या या सेवाकार्यातून हजारो रुग्णांना मदत मिळाली असून, मोतीबिंदूच्या समस्येमुळे दैनंदिन जीवनात अडचणींचा सामना करणाऱ्या नागरिकांसाठी हे अभियान आशेचा किरण ठरत आहे.
